Innalillahi Wa Inna Ilaihi Raji’un
Mulih Ka Jati Mulang Ka Asal
Ku : Agus Pranamulia
Nu nuju diajar Suluk,
Sekretaris Komisi Ekonomi MUI Kota Bogor, 2011-16
Sekretaris Komisi Ekonomi MUI Kota Bogor, 2011-16
Assalamu'alaikum, wr, wb. Sampurasun. Saurang 'Salik" nyaeta nu keur ngalalakon, jalma nu keur berupaya, ikhtiar ngomean diri, ngabenahan awak, sering nandangan kasulitan, bahkan tikosewad kana kasalahan, kana dosa, kana maksiat, nu akhirna putus asa. Tah dina tahapan awal ieu, urang kudu boga sumangeut anu ngagedur, kerja keras, tangguh bari pasrah. 1000 kali ragrag, 1000 kali hudang, bangkit. Bogor, 18 Januari 2018. (tina hikam bagian kahiji).
1. Mukadimah
Puji sinareng syukur mangga urang sanggakeun ka Gusti Allah Nu Maha Gofur, nu parantos maparin kanikmatan ka urang sadayana, taya kendatna. Sadaya puja kasanggakeun ku Allah ‘Azza wa Jalla, Pangeran nu murbeng alam sadaya. Sholawat miwah salam mugi salamina kasanggeukan ka jungjunan alam, nyatana habibana wa nabiyanaa, Muhammad SAW, ka kulawarga miwah ka para sahabatna oge mugi dikucurkeun tur dikocorkeun ka urang sadayana anu tunduk tumut kana agamana dieunul Islam.
2. Kasalahan utama :
Kasalahan umat Islam satiap ngadangu kalimah Innalillahi wa inna ilaihi raji’un, langsung wae kana kamaotan. Mun aya pangumuman ti masjid, pasti langsung kana maot. Padahal lepat pisan ieu teh. Kalimat suluk. Kalimat perjalanan urang sadayana. Perjalanan ti alam lahut – jabarut – malakut – mulki balik deui ka lahut.
3. Faaena tazhabun ? Rek kamarana atuh ?
Hiji pertanyaan anu teu perlu jawaban verbal, sabab jawabanana geus namper dina hate sewang-sewangan, geus nyampak di masing-masing urang. Tingal balitungan sorangan-sorangan da batur mah moal bisa ‘ngitung’ urang. Istafti qolbak ? tanya hate anjeun. Bakal nyampak tah jawaban anu nembrak jeung pohara jujurna.
4. Kumaha atuh nyatana ?
Lolobana mah geuning lumaku teh brasna lain ka nu hakiki, tapi ka tujuan anu teu jelas ujung huluna, teu puguh laratanana, teu atra tungtungna. Loba manusa anu poho jeung mindeng kabobodo tenjo, kasamaran tingal. Antukna hirup nuturkeun indung suku. Sakaparan-paran da dikadalikeun ku hawa nafsu.[1] Hirup digulung ku jigana jeung meureun kadituna ngarasa enya padahal lain. Jiga tepi sok padahal teuing nyangsang di mendi, ceunah geus lumaku padahal geuning cicing teu ingkah malah teu ngised-ngised acan. Sasab dina sisimpangan. Sasar kadungsang-dungsang. Mikung teu apal jalan. Kapincut ku nu teu pira, kabengbat ku harta, tahta, awewe. Kalejokeun ku titel jeung banda. Ceuk basa agamana mah saeutik anu syukur loba nu kufur. Inget-inget nalika awak geus nyangkorah di kuburan, ngababatang ngajadi bugang.
Dina saban-saban robah mangsa, ganti wanci ilang bulan, kurunyung taun sok mindeng kabandungan manusa ngalamun salaput umur kahayang pa tema-tema kareup teu rereh-rereh, harengreng ku dedengean, pajeujeut ku deudeuleuan, bencana alam dimana-mana. Daging dilegleg, lauk pauk diremus, beubeutian dihakan, bubuahan dicapluk, malah ku rakus-rakus na manusa aspal semen oge dilegleg. Jadi ruksakna ieu dunya oge ku manusa.
Jigana mah payus jeung kecap manusa, anu hartina poho. Al-Insanu Mahalul Khoto’i Wannasyan. Jalmi mah tempatna hilap sareng salah. Urang mah loba pohona tibatan ingetna, teuing api-api poho. Poho meh jadi watek urang. Geus puguh ancurna hiji bangsa teh alatan lampah nirca tapi dina pamustunganana mah lampah ieu teh diulang deui diulang deui. Jigana na mah bener naon anu ditulis ku sastrawan kahot Milan Kundera cenah jihad pangbadagna mah taya lian ngayonan sifat poho ieu.
Dina ulekan sosial we, pek tengetkeun asana loba keneh anu basilat tibatan anu jujur. Loba keneh anu resep ngabustam tinimbang ngomong bener, jeung sajabana. Anu dominan mah mah singhoreng laku lacut lain talajak sieup, lampah nirca lengkah awas. Bongan bangkong kacai teu dimandikeun, bongan hirup bararohong pasini teu dijadikeun. Bangkong dikongkorong kujang, kacai ngajingjing cameti bongan hirup loba ngabohong ti tukang kana jangji teu bisa nepati. Teu salah naon anu ditulis ku Abu Nawas, anu baheula mah keur budak soka dihaleuangkeun antara adan jeung komat. Ilahilastu lil firdaosi ahla wa la aqwa ala naril jahimi. Fahabli taubatan wagfir dzanbil adzimi. Nun Gusti abdi sanes ahli surga, tapi abdi henteu kiat kana naraka. Mugi Gusti ngahampura dosa margi Gusti tukang ngahampura dosa.
Jigana mun ku urang dilenyepan asana loba keneh dosana tibatan ganjaranana, loba keneh laku nircana tinimbang anu hadena. Loba bantangulna tibatan tuhuna. Palangsiang urang teh ahli naraka. Boa-boa iman urang teu beda jeung tatangkalan anu pinuh ku hileud. Ranggas maruragan, ngarangrangan.Tong boro-boro buahan dauna oge dugul. Tong ieuh ditiup angin puyuh kadupak budak oge langsung runtuh.[2]
4. Inna Lillahi
Mun dilenyepan saestuna lungsurna agama ka alam dunya, taya lian ngingetan jalma sangkan teu lali kana purwadaksi. Supaya eling kana wiwitan, sadar kana wekasan. Eling anu bisa mulangkeun urang kana jatina, kana acining acina salaku manusa anu kumelendang di dunya sarta bakal mulang ka alam ka langgeungan. Alam langgeng salanggeng-langgengna, abadi dina harti saujratna. Agama mere informasi ngeunaan ti mana nya urang miang jeung ka mana urang mulang.
Kumargi tina bahasa Arab, mangga kalimah Inna teh urang erab (I’rab)[3] heula.
انا
Inna : harfun nasbin wa taukid. Na domirun muttasilun barijun ismu inna mabniyun ‘ala sukun fima laiha nasbin liannahu ismun mabniyun la ya i’robi[4]
لله
Lillahi : wal lam wa harfun jarrin majrun walaf’ul jalalah bil lam mustaqbilun muta’aliqun bi mahzufin taqdiruna kainuna wis taqror na.[5]
Hartosna Inna : saestuna urang sadanyana, lillahi : asal ti Allah. Mataholang na mah Innalillahi teh kuat iman. Imah urang milik Allah. Anak urang milik Allah. Jabatan saya milik Allah. Kandaraan urang milik Allah. Sawah urang milik Allah. Diri urang milik Allah.
5. Ujian sareng musibah
Salami jumeneng di alam dunya, manusa bakal di uji ku musibah Allah dina hal : harta sareng jiwa.[6] Kalimah musibah mun di analisa ku kaelani jeung yakulu : tsulasi, mazid fi, asal, ajwa tina so-wa-ba, hartina ‘apapun yang mengenainya’ rek amis rek pait, rek geunah rek teu geunah.[7] Umumna urang sadayana ngahartikeun musibah teh anu pait wae, saperti : Khouf (ketakutan, gangguan kaamanan), ju’ (kalaparan, kurang gizi), naqsim minal amwal (terpuruk ekonomi), anfusi (penyakit sareng kamaotan), tsamarot (gagal panen). Saha nu lulus tina ujian nyaeta anu sabar. Saha anu sabar teh :
6. Wa Inna Ilahi Raoji’un
ؤ
Jeung[8]
انا
Harfun nasbin wa taukid, jar majrur ......
اليه
رجعؤن
roji’una khobar inna, al wawu liannahu jam’ul muzakarris salim.
Rajiun. Kembali kepada aturan. Nalika kaluar tina aturan, pasti sancur.
7. Ihsan
Ihsan dina leuit ajaran Islam meh oge sok disebut tasawuf. Objek riset na lain jeung urusan fisik raga tapi jeung metafisika rasa. Ikhtiar kumaha sangka urang mibanda alam rohani anu surti, anu gumulung jeung anu Maha Suci. Payus pisan apan jeung tempat asal pamiangan manusa anu suci tea. Fitroh ceuk basa agamana. Sakumna manusa nalika gubrag ka alam dunya teu nananggung kasalahan sok komo dosa turun tumurun tapi estuning clik putih clak herang. Nu ngabalukarkeun rumeuk jeung ceudeum taya lian lingkungan jeung talajak urang. Allah SWT moal rek nyiksa jeung ngaganjar ka sakumna makhluk. Anging mahkuk kudu eling kana eta siksaan jeng ganjaran. Ratu tara ngahukum Pamarentah tara nyiksa. Anging laku lampah anu jadi hakim na diri. Melak hade jadi hade, melak goreng jadi goreng. Cindekna cilaka atawa salametna manusa gumantung kana amal perbuatanana.
Salila indit teu weleh nataharkeun rasaning kasadaran, teu mengpar tina tujuan awal. Dina ungkara Jawa mah sangkan paraning dumadi. Ihsan teh Kaannaka tarohu fa in lam takun tarohu fainnahu yaroka. Ngarasakeun ditingali ku Manten-Na tepi ka mibanda rasa rumasa. Indit suci balik ge suci, ulah balik lamokot ku daki, kotor ku leutak. Manusa anu teu weleh ucang angge antara kenca kaiblisan jeung katuhu kapangeranan, dina tigubragna kana laku setan oge agama mere solusi cenah kudu rikat tobat.
Tobat teh babalik pikir bawirasa hakekatna mah mulangkeun deui diri anu geus kabandang kunu lain-lain kana jalan anu hakiki, balik deui tina lengkah anu salah kana jalan anu sakuduna sangkan anjog jeung tempat indit henteu malah beuki sasab lunta ka anggangna. Tobat kudu ditataharkeun dina rasaning tekad anu bener-bener lain ukur purang kadengda sok komo dijadikeun kaulinan badis urang dahar sambel. Ongkoh lada tapi col deui col deui.[9] Wallahu a’lam.
8. Panutup.
Allahumma bariklana fi rojaba wasa’ban wabaligna fi ramadhan. Robbana aatina fiddunya hasanah wafil akhiroti hasanah wakina adzabannar. Aamiin.
Referensi :
Asep Salahudin, 2011, Bandung : Majalah Mangle nomor 2341, 29 September - 5 Oktober, dina kolom Munara Cahya : Agama nepikeun kana urut indit, halaman 14-15.
-------------------, 2011, Bandung : Majalah Mangle nomor 2331, 14 – 20 Juli, dina kolom Munara Cahya : regang-regang kaimanan, halaman 14-15.
Ajengan Zezen Zaenal Abidin, 2012, Sukabumi : Ceramah Kitab Hikam di Pesantren Az-Zaeniah.
Asep Sunandar Sunarya, 2014, Bandung : Ceramah di Universitas Langlangbuana.
------------------------------, 2014, Purwakarta : Ceramah
DINU KIWARI NGANCIK NU BIHARI SEJA SAMPEUREUN JAGA
Komentar